Upp­gjörið: ÍBV - Haukar 36-31 | Eyjakonur tryggðu sér sæti í úr­slitum

ÍBV tryggði sér sæti í úrslitaeinvíginu um Íslandsmeistaratitilinn eftir 36-31 sigur á Haukum í kvöld eftir æsispennandi tvíframlengdan leik.

Leikurinn byrjaði jafnt á milli liðanna þar sem hvorugu þeirra tókst að slíta sig frá hinu. ÍBV náði tveggja marka forystu á síðasta þriðjungi fyrri hálfleiks en Haukakonur svöruðu þá vel og komust yfir með einu marki. Það varði þó í skamma stund og ÍBV leiddu með einu marki þegar gengið var til búningsherbergja, 15-14.

Það var allt í járnum í síðari hálfleik þar sem liðin skiptust á að taka forystuna. ÍBV virtust vera að sigla sigrinum heim á lokamínútunni en tapaður bolti í sókn ÍBV olli því að Haukar jöfnuðu. Í kjölfarið varði Sara Sif Helgadóttir síðustu sókn ÍBV og tryggði Haukum framlengdum leik.

Það var allt jafnt eftir fyrstu framlengingu, 30-30. Það þurfti því að tvíframlengja leikinn en sóknarleikur Hauka var afhroð í framlengingunni og fann liðið engar lausnir. Þreyta og hátt spennustig eru líklega orsakavaldarnir.

Amalie Froland varði þá víti frá Emblu Steindórsdóttur á mikilvægum tíma en meiddist í kjölfarið og eru það hrikalegar fréttir fyrir ÍBV sem eru á leiðinni í úrslitaeinvígið.

Haukar köstuðu leiknum svo algjörlega frá sér í seinni hálfleik síðari framlengingarinnar og ÍBV fór því með sigur af hólmi, 36-31.

Atvik leiksins

Varsla Söru Sifjar á lokasekúndunum í síðari hálfleik venjulegs leiktíma tryggði Haukum framlengingu.

Stjörnur og skúrkar

Sandra Erlingsdóttir var markahæst hjá ÍBV með tíu mörk. Þar á eftir kom Agnes Lilja Styrmisdóttir sem átti frábæran leik fyrir Eyjakonur.

Ólöf Maren Bjarnadóttir gerði afskaplega vel í innkomu sinni og endaði með 42% vörslu.

Embla Steindórsdóttir var markahæst í liði Hauka með átta mörk og Rakel Oddný Guðmundsdóttir þar á eftir með sex mörk.

Stemning og umgjörð

Flott stemning í Eyjum og troðfull höllin.

Dómarar

Vel dæmdur leikur að mínu mati. Lítið sem ekkert um vafamál og svona nánast allt í teskeið.