Hrefnur skoðaðar og svo skotnar

Sjávarútvegsráðuneytið tilkynnti í fyrradag að heimilaðar verði veiðar á 39 hrefnum í vísindaskyni en það eru fjórtán fleiri en heimilað var að veiða í fyrra. Vignir segir að hvalveiðimenn hafi samráð við hvalaskoðunarmenn um hvenær og hvar þeir veiði og telur líklegast að veiðar fari að mestu fram að nóttu. "En ég hef mestar áhyggjur af því að þeir taki gæfustu og skemmtilegustu dýrin sem hafa verið hvað aðgengilegust fyrir okkur," bætir Vignir við. Ásbjörn Björgvinsson formaður Hvalaskoðunarsamtaka Íslands bregst harðlega við ákvörðun sjávarútvegsráðherra. "Það er alveg með ólíkindum að stjórnvöld skulu vera að skemma það sem við erum að reyna að byggja upp því það eru gæfustu dýrin sem yfirleitt eru skotinn og þar með er verið að taka bestu söluvöruna og skjóta hana," segir hann. Hann dregur einnig vísindarlegt gildi veiðanna í efa. Ólafur S. Ástþórsson aðstoðarforstjóri Hafrannsóknarstofnunar segir að hvalveiðimenn og hvalaskoðunarmenn hafi samráð sín á milli og þannig megi komast hjá árekstrum. Í tilkynningu frá sjávarútvegsráðuneytinu segir að afurðir þeirra hrefna sem verði veiddar í ár verði nýttar eftir því sem hægt er. Árni Finnsson formaður Náttúruverndarsamtaka Íslands segir þetta bera með sér að sjávarútvegsráðuneytið hafi áttað sig á því að sennilegast verði að henda miklu af afurðunum þar sem ekki sé markaður fyrir hrefnukjöt hvorki innanlands né til útflutnings. Því til rökstuðnings segir hann að samkvæmt skýrslu sem Þorsteinn Sigurlaugsson hagfræðingur gerði fyrir samtökin kemur fram að 62 tonn hafi fallið til við veiðarnar í fyrra og árið þar áður og þar af hafi um það bil helmingur ekki selst.