Beðið ákvörðunar forsetans

Ríkisstjórn Gerhards Schröders, kanslara Þýskalands, er fallin. Þýska þingið felldi trauststillögu á stjórnina í morgun með 296 atkvæðum gegn 151. Beðið er ákvörðunar forsetans um hvort kosningar verði haldnar í haust. Schröder hafði hvatt þingmenn til að kjósa gegn ríkisstjórninni svo flýta mætti kosningum. Það gekk eftir en Schröder hafði lýst því yfir að hann yrði að fá endurnýjað umboð frá kjósendum til að koma heldur óvinsælum tillögum ríkisstjórnarinnar um efnahagsumbætur í gegn. Á þinginu í dag sagði hann að markmið sitt væri alveg ljóst: Hann vilji biðja forsetann um að leysa upp þingið og boða til nýrra kosninga. „Þetta myndi gera mér og flokki mínum kleift að takast á við sársaukafull og erfið mál,“ sagði Schröder. Það er forsetinn, Horst Köhler, sem ákveður hvort þing verði rofið og boðað til kosninga ári fyrr en ætlað var. Hann hefur þrjár vikur til að taka ákvörðunina en ýmsir hafa gagnrýnt Schröder fyrir allt þetta sjónarspil og telja það að fella eigin ríkisstjórn vísvitandi geti jafnvel strítt gegn stjórnarskránni. Þetta á sér þó fordæmi. Árið 1982 tapaði þáverandi kanslari, Helmut Kohl, viljandi kosningu um vantraust á ríkisstjórn sína til að auka meirihluta sinn á þingi í næstu kosningum. SPD, Sósíaldemókrataflokkur Schröders, getur þó síður en svo treyst því að hann beri sigur úr býtum ef kosningar verða haldnar í haust en flokkurinn hefur undanfarið tapað í mikilvægum héraðskosningum. Allar líkur eru á að Kristilegir demókratar, með Angelu Merkel í broddi fylkingar, nái völdum en þeir hafa undanfarið mælst með allt upp í tuttugu prósentustigum meira fylgi í skoðanakönnunum. Merkel yrði þá fyrst kvenna til að gegna embætti kanslara Þýskalands.