Útsölur fara hægt af stað

Sumarútsölurnar eru nú víða hafnar í höfuðborginni og víðar og eru kaupmenn almennt sammála um að hægt sé að gera svipuð kaup á þeim og í fyrra. Afslættir eru algengir frá 30 - 40 prósentum og fara hækkandi eftir því sem á líður. Mörgum finnst þó nóg um að útsölutíminn skuli vera orðinn heill mánuður og telja það útskýra að hluta hversu útsölur fara rólega af stað. Meðal þeirra verslana þar sem útsölur eru hafnar og Fréttablaðið heimsótti í gær voru Hagkaup, BT, Húsgagnahöllin, Esprit, Accessorize og Útilíf. Var greinilegt að margir á viðkomandi stöðum höfðu eingöngu komið til að gera góð kaup á útsölunum en flestir kaupmenn voru þó á því að útsölurnar færu rólega af stað. Tóku nokkrir viðskiptavinir undir það og sögðust ekki hafa gert sér grein fyrir að útsölurnar væru byrjaðar fyrr en komið var á staðinn. Ekki var meira af fólki í Kringlunni þennan fyrsta dag útsölunnar en venja er en flestar verslanir þar auglýsa góðan afslátt á vörum sínum. "Þetta er fyrsti dagurinn og þetta fer rólega af stað," sagði Ingibergur Jóhannsson, verslunarstjóri hjá Útilífi í Kringlunni. "Þetta er stór ferðahelgi og enginn hefur fengið útborgað enn sem komið er. Það verður forvitnilegt að sjá hvernig gengur um helgina en mig grunar að mörgum finnist þessi langi útsölutími verið kominn út í öfgar. Útsalan er allan júlímánuð og fólk hinkrar við enda algengt að verð lækki þegar líða fer á útsölurnar." Rósa Guðjónsdóttir, verslunarstjóri í Esprit, tók í sama streng. "Þetta byrjar með ágætum hjá mér en það eru færri á ferð en ég hefði kannski búist við miðað við útsölur hér sem almennt eru vel sóttar. En þetta er fyrsti dagurinn og kannski ekki mark á takandi ennþá. Mér sýnist verð og afslættir nú vera með svipuðu móti og á síðasta ári og þær útsölur voru almennt afar góðar þannig að þetta lofar góðu fyrir viðskiptavininn."