Ísland ætlar í öryggisráðið

Forsætisráðherra Íslands staðfesti á fundi forsætisráðherra Norðurlandanna að Ísland myndi sækjast eftir sæti í öryggisráði Sameinuðu þjóðanna. Hætti Ísland við gætu Norðurlöndin orðið atkvæðalaus í ráðinu í sex ár. Á árlegum sumarfundi forsætisráðherra Norðurlandanna á suðurhluta Fjóns í Danmörku kom meðal annars til umræðu hugsanleg aðild Íslands að öryggisráðinu. Ákvörðunin um að sækjast eftir setu í ráðinu var tekin fyrir nokkrum árum. Málið fór fyrir utanríkismálanefnd Alþingis og var samþykkt í ríkisstjórn. Nú er staðan hins vegar sú að þrjú lönd sækjast eftir tveimur lausum sætum: Ísland, Austurríki og Tyrkland. Það þýðir að Ísland þarf að fara í kostnaðarsamt framboð. Halldór Ásgrímsson forsætisráðherra segir eðlilegt að fram fari endurmat á stöðunni sem nú sé verið að gera. „En engin ný ákvörðun hefur verið tekin þannig að sú gamla stendur,“ segir Halldór. Anders Fogh Rasmussen, forsætisráðherra Danmerkur, segist telja sig geta fullyrt fyrir hönd allra Norðurlandaþjóðanna að þær muni styðja framboð Íslendinga. „Íslendingar ákveða auðvitað sjálfir hvort þeir bjóða sig fram en Halldór Ásgrímsson sagði okkur í dag að ákvörðun Íslendinga standi enn og vinaþjóðirnar munu standa við sitt,“ segir Rasmussen. Danmörk er nú fulltrúi Norðurlanda í öryggisráðinu í fjórða sinn frá árinu 1953. Norðurlönd hafa átt sæti í ráðinu í tvö ár og setið hjá næstu tvö ár á eftir. Danmörk situr því út næsta ár, Norðurlönd sitja hjá 2007 og 2008 og Ísland yrði rödd þeirra í ráðinu 2009 og 2010. Hætti Ísland við framboðið gætu Norðurlönd því orðið atkvæðalaus í öryggisráðinu í sex ár. Það kom skýrt fram á fundi norrænu forsætisráðherranna í gær að í norrænu samstarfi eru málefni Sameinuðu þjóðanna mikilvæg. Halldór segir að allir hafi verið sammála um að það skipti miklu máli að endurskoða og endurbæta Sameinuðu þjóðirnar og að Norðurlandaþjóðirnar tækju virkan þátt í því samstarfi.