Heildarafli í samræmi við ráðgjöf

Sjávarútvegsráðherra undirritaði í dag reglugerð um leyfilegan heildarafla á fiskveiðiárinu 2005-6 sem hefst þann 1. september. Í tilkynningu frá ráðuneytinu segir að leyfilegur heildarafli verði í öllum aðalatriðum í samræmi við ráðgjöf Hafrannsóknastofnunarinnar. Þannig verður heildarafli í þorski 198 þúsund tonn, í ýsu 105 þúsund tonn, ufsa 80 þúsund tonn, karfa 57 þúsund tonn, grálúðu 15 þúsund tonn, steinbít 13 þúsund tonn, keilu 3.500 tonn, íslenskri sumargotssíld 110 þúsund tonn, úthafsrækju 10 þúsund tonn og rækju í Arnarfirði 300 tonn. Frávik frá ráðgjöfinni eru þau að leyfilegur heildarafli í skrápflúru verður 3.500 tonn (1.500 tonn umfram ráðgjöf), í skarkola 5.000 tonn (1.000 tonn umfram ráðgjöf), í sandkola 4.000 tonn (1.500 tonn umfram ráðgjöf), í löngu 5000 tonn (500 tonn umfram ráðgjöf), í þykkvalúru 1.800 tonn (200 tonn umfram ráðgjöf), í skötusel 2.500 tonn (300 tonn umfram ráðgjöf), í langlúru 2.400 tonn (200 tonn umfram ráðgjöf) og í humri 1.800 tonn (eða 200 tonn umfram ráðgjöf). Jafnframt hefur sjávarútvegsráðherra undirritað reglugerð um hækkun á leyfilegum heildarafla á yfirstandandi fiskveiðiári í þykkvalúru úr 1.600 tonnum í 1.800 tonn.