Sammála um ábyrgð stórfyrirtækja

Í þjóðhátíðarræðu sinni í gær lét Halldór Ásgrímsson í ljós þá skoðun að stórfyrirtæki með góða afkomu ættu að bera samfélagslega ábyrgð og taldi eðlilegt að þau tækju þátt í mikilvægum málum á sviði nýsköpunar, menningar og velferðar. "Þeim ber að nýta hagnað til að byggja upp," sagði Halldór. Björgólfur Guðmundsson, formaður bankaráðs Landsbankans, sló mjög svipaðan tón í ávarpi ársskýrslu Landsbankans fyrir síðasta ár. Þar sagði hann ásýnd Landsbankans hafa eflst á árinu þar sem hann hefði einsett sér "að sýna samfélagslega ábyrgð og taka þátt í margvíslegum verkefnum sem öll eiga það sameiginlegt að efla menntir, listir og menningu og bæta mannlíf." Nýjasta dæmið um samfélagslegan stuðning Landsbankans er við Baráttuár kvenna sem hefst með Þingvallafundi í dag, en Landsbankinn er bakhjarl átaksins. Hann styður einnig við íþróttir og margvíslegt menningarstarf. Landsbankinn starfrækir sérstakan menningarsjóð og einnig á Minningarsjóður Margrétar Björgólfsdóttur að úthluta um hundrað milljónum á ári hverju. Jóhannes Jónsson í Bónus kveðst einnig að mörgu leyti vera sammála skoðun Halldórs Ásgrímssonar. "Ég held það sé mjög vel til fallið að stórfyrirtæki með góða afkomu leggi eitthvað af mörkum og beini þá fjármagninu í þann farveg þar sem stjórnendum fyrirtækjanna finnst skóinn kreppa," segir Jóhannes. "Skoðun hins opinbera á ekki ein að ráða för." Jóhannes segir Baug alltaf hafa reynt að láta eitthvað af hendi rakna. "Ef við gefum ekki neitt, þá fáum við ekki neitt," segir Jóhannes. Baugur ákvað nýlega að stofna sjóð sem á að styrkja menningar- og listalíf og velferðarmál barna. 300 milljónir króna verða lagðar í sjóðinn á árinu en hann á að sameina ýmsa styrktarstarfsemi fyrirtækisins. Annað nýlegt dæmi um fyrirtæki sem reynir að leggja eitthvað af mörkum er Samherji, sem ákvað að styrkja nýsköpun í atvinnulífi Stöðvarfjarðar um tuttugu milljónir, en frystihúsi Samherja þar verður lokað í september.