Miklar framkvæmdir í Leifsstöð

Miklar framkvæmdir hafa staðið yfir í Flugstöð Leifs Eiríkssonar að undanförnu og í dag var opnuð ný komuverslun Fríhafnarinnar. Ein þekktasta verslun á Íslandi, Fríhöfnin, hefur fengið andlitslyftingu svo um munar. Hún hefur verið stækkuð úr 460 fermetrum í 1000 fermetra. Stækkun verslunarinnar er mikil bylting frá því sem var. Í nýju búðinni fá allir vörusflokkar meira rými en áður sem og útstillingar. Snyrtivörur fá sérstakan sess og eru í nú í sérstakri deild í versluninni. Sturla Eðvarðsson, framkvæmdastjóri Fríhafnarinnar, segir að margir viðskiptavinir þekki þrengslin sem hafi verið í versluninni fyrir stækkun. Oft og tíðum hafi fólk þurft að bíða í biðröð til þess að komast inn í hana en nú sé hún björt og rúmgóð með góðu vöruvali til þess að uppfylla þær kröfur sem viðskiptavinir geri til hennar. Þá sé verðið það hagstæðasta sem þekkist. Samhliða þessum breytingum var hægt að stækka tvö af þremur færiböndum. Stækkun komuverslunarinnar er fyrsti hluti af stækkun flugstöðvarbyggingarinnar til suðurs, en byggingin verður stækkuð um 6000 fermetra á tveimur hæðum fyrir árslok 2006. Starfsmannafjöldi hefur aukist gríðarlega í Leifsstöð og til að mynda eru um 100 starfsmenn í Fríhöfninni einni saman en í vor voru ráðnir 90 sumarstarfsmenn til starfa þar.