Gott veður á þjóðhátíðardaginn

Það er þjóðsaga á Íslandi að það sé alltaf rigning á 17. júní en þann dag árið 1911 var glampandi sól um allt land og hiti 8-15 stig, hlýjast í höfuðborginni. Þannig verður það einnig á morgun. Það er ekki rétt að það sé alltaf rigning á þjóðhátíðardaginn en því er ekki að neita að það hefur verið nokkuð oft. Þeir sem eru forvitnir um hvernig þetta hefur verið í gegnum árin geta kíkt inn á vef Veðurstofunnar þar sem er að finna veðrið á 17. júní allt frá 1944 til 2004 og veðrið 17. júní 1911 er sett inn sem bónus. Slóðin er: vedur.is/athuganir/vedurkort/17júní/. Fyrir þá sem ekki nenna því er hægt að upplýsa að kaldasti 17. júní var 1959, þá var hitinn aðeins fimm gráður. Heitustu þjóðhátíðardagarnir voru 1911 og 2002, 15 gráður báða dagana. En stóra spurningin er auðvitað: Hvernig verður blessað veðrið á morgun? Ásdís Auðunsdóttir veðurfræðingur segir það verða misjafnt eftir landshlutum. Það verði norðlæg átt og rigning framan af degi fyrir norðan og sennilega skýjað en úrkomulítið á Vestfjörðum og suður með Vesturlandi. Það ætti hins vegar að geta orðið nokkuð bjart og þurrt á suðvesturhorninu en suðaustanlands verði einhverjar skúraleiðingar.