Stærra hótel í Stykkishólmi

Hótel Stykkishólmur stækkar um rúmlega helming þegar nýbygging hótelsins verður tilbúin á næstu dögum. Nýja byggingin verður alls þrjár hæðir en þegar hefur neðsta hæðin verið opnuð en eftir stækkunina verða alls áttatíu herbergi á hótelinu en voru fyrir hana rúmlega þrjátíu. Sömu eigendur eru að Hótel Stykkishólmi og Hótel Borgarnesi og munu hótelin tvö hafa um hundrað og fimmtíu herbergi samanlagt og verða þannig stærsti aðilinn í framboði á gistirými á vesturlandi. Að sögn Guðna Halldórssonar, hótelstjóra á Hótel Stykkishólmi, hafa framkvæmdirnar gengið vel. "Við opnuðum neðstu hæðina á dögunum og næstu tvær hæðir verða teknar í notkun á næstu dögum. Þetta eru glæsileg herbergi og við erum afar ánægðir með framkvæmdina. Við álítum að hér sé ört vaxandi ferðamannabær með allri náttúrufegurð Breiðafjarðar og með stækkuninni teljum við að við séum að uppfylla kröfur ferðaþjónustunnar," segir Guðni.