Sömu fargjöld hjá flugfélögunum

Bandaríska flugfélagið Delta hækkaði þann 15. júní flest fargjöld í flugi yfir Atlantshafið. Þotueldsneyti hefur hækkað töluvert í verði síðustu mánuði og gætu fleiri fargjöld átt eftir að hækka. Íslensku flugfélögin búast þó ekki við að hækka fargjöld á næstunni. "Við höfum verið að taka þennan kostnað á okkur," segir Birgir Jónsson, framkvæmdastjóri Iceland Express, sem á í harðri samkeppni í lágfargjaldafluginu. "Við viljum ekki hækka fargjöldin." Hann á þó ekki von á lækkun fargjalda á næstunni. "Það er ekkert sérstakt á döfinni hjá okkur hvað það varðar," segir Guðjón Arngrímsson, upplýsingafulltrúi Icelandair um hækkun fargjalda. Guðjón segir alþjóðlega samkeppni á flugmarkaði vera mjög virka og bendir líka á að flugfélög noti mjög ólíkar aðferðir til að verðleggja. Það sé ekki sjálfgefið að hækkanir á eldsneytisverði skili sér út í fargjöldin. Þotueldsneyti hækkaði um 45 prósent milli mars og apríl, en lækkaði aftur í maí. Almennt hefur verðið hækkað og ekki er séð fram á lækkun á næstunni°.