Samstarfi slitið til að fá fund

"Markmiðið var aldrei að hætta samstarfinu við menntamálaráðuneytið heldur aðeins að vekja athygli á því ástandi sem við vorum óánægð með," segir Eiríkur Jónsson, formaður Kennarasambands Íslands en Kennarasambandið sendi frá sér tilkynningu í gær um það að sambandið hefði sagt sig frá öllu samstarfi við ráðuneytið vegna styttingu náms til stúdentsprófs. Eiríkur segir að hann og Elna Katrín Jónsdóttir, varaformaður Kennarasambandsins, hafi átt fund með fulltrúum menntamálaráðuneytisins 28. apríl síðastliðinn þar sem lagðar voru fram áherslur Kennarasambandsins og segir Eiríkur að í framhaldinu hafi verið búist við því að fundur fengist með ráðherra en til hans hafi ekki verið boðað og því hafi verið gripið til þess ráðs að slíta samstarfi við ráðuneytið. Þorgerður Katrín Gunnarsdóttir menntamálaráðherra segir að skilaboð Kennarasambandsins hafi komið henni mjög á óvart. "Ég er búin að leggja mikla áherslu á að eiga gott og mikið samstarf við alla aðila vegna þessa máls. Ég hef í því skyni fundað með framhaldsskólakennurum allra skóla milliliðalaust og það hafa komið mjög margar og góðar ábendingar af þeim fundum. Ég er búin að bjóðast til að hitta fulltrúa Kennarasambandsins núna strax eftir helgi. Það hefur aldrei verið vandamál af minni hálfu og ég hef allan þann tíma sem ég hef verið í ráðuneytinu unnið þannig að ég vil hafa samráð og gott samstarf við fólk, kennaraforystuna sem aðra og tek á móti þeim með opnum hug," segir Þorgerður Katrín. Eiríkur segir að fulltrúar Kennarasambandsins muni mæta á fund sem ráðherra hefur boðað til eftir helgi.  "Við munum að sjálfsögðu mæta á fund eftir helgi og ég vona að þetta verði til þess að samskiptin verði í eðlilegu fari," segir hann.