Konur skunda á Þingvallafund

Sunnudaginn 19. júní verða níutíu ár liðin frá því að konur fengu kosningarétt og í tilefni af því ætla öll helstu kvenréttindasamtök landsins að efna til Þingvallafunds kvenna á sunnudaginn undir ákallinu "Skundum á Þingvöll og treystum vor heit." Árið 2005 verður baráttuár kvenna, en alls eru yfir þrjátíu áfangar á leiðinni sem eiga stórafmæli í ár. Sem dæmi má nefna að Kvenfélagasamband Íslands var stofnað 1930 og Vigdís Finnbogadóttir var kosin forseti árið 1980. Einnig verður athöfn í Hólavalllakirkjugarði í Reykjavík laugardaginn 18. júní þar sem leggja á blómsveiga á leiði margra frumherjanna í baráttu kvenna. Þetta var kynnt á blaðamannafundi í gær. Á honum var einnig undirritaður samstarfssamningur við Landsbankann sem verður bakhjarl baráttuársins og styrkir það alls um 3,5 milljónir. Rútur til Þingvalla munu leggja af stað frá Tækniháskóla Íslands og Aðalbyggingu Háskóla Íslands klukkan 12:00. Dagskráin á Þingvöllum hefst 13:00.