Ölvun ekki aukist

Vínbúð opnaði á Reyðarfirði fyrir tólf dögum og hafa bæjarbúar, margir hverjir, tekið henni fegins hendi. Sýnileg ölvun hefur þó ekki aukist í bænum, að sögn lögreglu. "Þetta hefur farið mjög vel af stað og búðin fengið góðar viðtökur," segir Björgvin Pálsson, verslunarstjóri vínbúðarinnar sem rekin er samhliða veiði- og útivistaversluninni Veiðiflugunni í nýju verslanamiðstöðinni Molanum. Lengi vel þurftu Reyðfirðingar, líkt og aðrir Austfirðingar, að fara alla leið til Seyðisfjarðar eftir bokkunni en leiðin styttist til muna þegar áfengisútsölur voru opnaðar á Egilsstöðum og í Neskaupstað. "Þetta hefur lengi vantað hjá okkur," segir Björgvin, verslunarstjóri, og bætir við að mikið líf sé almennt að færast yfir Reyðarfjörð með álversbyggingunni. "Apótekið hefur til dæmis verið opnað aftur en því var lokað fyrir átta árum."