HÍ útskrift í Egilshöll

Útskrift Háskóla Íslands fer fram í Egilshöll í Grafarvogi þetta sumarið. Verður hún laugardaginn 25. júní og hefst klukkan 13. Er áætlað að hún standi í tvær og hálfa klukkustund. Síðustu ár hefur athöfnin farið fram í Laugardalshöll en hún er nú lokuð vegna viðhalds og breytinga. Áður fór útskriftin fram í Háskólabíói en það hefur löngu sprengt athöfnina utan af sér enda hefur nemum við HÍ fjölgað mjög. Þetta verður í síðasta sinn sem Páll Skúlason brautskráir nema frá Háskólanum en hann lætur af embætti rektors tæpri viku eftir athöfnina. Við tekur Kristín Ingólfsdóttir sem bar sigur úr býtum í rektorskjöri fyrr á árinu. Um 800 nemendur útskrifast frá Háskóla Íslands að þessu sinni.