Menningarauki í miðborginni

Stjórn Listaháskóla Íslands hefur farið þess á leit við borgarstjóra og menntamálaráðherra að skólanum verði fundin lóð á bakka gömlu hafnarinnar í Reykjavík. Þar á tónlistar- og ráðstefnuhús að rísa og standa ríki og borg saman að þeirri framkvæmd. Listaháskólinn var stofnaður 1999 og hefur síðan verið starfræktur í þremur húsum í Reykjavík. Af því hefur hlotist margvíslegt óhagræði og brýnt að mati stjórnenda skólans að koma starfseminni undir eitt þak. "Ávinningurinn af sambúð listgreinanna nýtist okkur ekki nema að litlu leyti meðan við erum klofin," segir Hjálmar H. Ragnarsson, rektor Listaháskólans. "Rekstrarlega er þetta líka þungt og erfitt, við þurfum þrennt af öllu því við erum á þremur stöðum. En það er aðallega þessi kraftur í sambúð listanna sem við teljum að geti margfaldast í einu húsi," segir rektor. Húsnæðismál Listaháskólans hafa verið til umræðu frá því áður en hann var formlega stofnaður en senn gæti séð fyrir endann á þeim. Hjálmar velkist ekki í vafa um að miðborg Reykjavíkur sé rétti staðurinn fyrir Listaháskóla Íslands. Hann segir nauðsynlegt að krafturinn sem skólinn býr yfir nýtist samfélaginu öllu og það gerist best í miðborginni. Þá sé samlegð starfseminnar með þeim stofnunum og fyrirtækjum sem þar eru fyrir augljós. "Svæðið getur öðlast enn meira líf með okkur. Í skólanum er starfsemi frá morgni til kvölds flesta daga vikunnar á meðan tónlistarhúsið verður meira viðburðatengt." Skólinn sé ekki einasta menntastofnun heldur líka miðstöð menningar og listar. Það er því ekki bara skólans vegna heldur líka borgarsamfélagsins sem miðborgin er hentugur staður. "Ég held að það hljóti að vera eftirsóknarvert fyrir miðborgina að fá þennan hóp af fólki til sín. Við erum ekki bara að tala um kennara og nemendur heldur mun fjöldi listamanna og fólks sem tengist listum eiga hér leið um og gestir koma frá útlöndum og utan af landi. Svo er vert að nefna að um þriðjungur af húsnæðinu sem við hyggjumst byggja er fyrir almenning. Hér verða margskonar listviðburðir og uppákomur af hvaða tagi sem er." Áætlanir gera ráð fyrir að nýtt hús Listaháskólans verði um 11.000 fermetrar og að það kosti á milli tvo og þrjá milljarða króna að reisa það. Að mati Hjálmars er nægt pláss fyrir stórt hús á byggingarreitunum við gömlu höfnina og í erindinu til borgarstjóra og menntamálaráðherra sé verið að biðja um að skólinn verði hafður með í þróunar- og skipulagsferlinu sem nú stendur. Og hann er bjartsýnn á að erindinu verði vel tekið af yfirvöldum og að hægt verði að setja skólann í nýju húsi við gömlu höfnina í Reykjavík haustið 2008. "Ég er mjög bjartsýnn. Skólinn er sterkur og ímynd hans er góð, vitund um gildi háskóla í samfélaginu er að aukast og menntamálaráðherra hefur lýst yfir að hann telji byggingu Listaháskóla Íslands vera forgangsmál á sviði háskólamála."