Grunur um hnífsstungu um borð

Þyrla Landhelgisgæslunnar sótti rússneskan sjómann á haf út í nótt en grunur leikur á að hann hafi verið stunginn með hnífi um borð í skipi sínu. Skipið er eitt af svokölluðum sjóræningjaskipum sem verið hafa í fréttum að undanförnu. Umboðsmaður togarans Ostrovets frá Dóminíka hafði samband við stjórnstöð Landhelgisgæslunnar klukkan 2.30 í nótt vegna skipverja sem hafði hlotið stungusár á kvið.  Samkvæmt upplýsingum frá togaranum hafði skipverjinn hlotið áverkana við fiskvinnslu um borð.  Skipið var statt á Reykjaneshrygg, 268 sjómílur frá Reykjavík. Umboðsmaðurinn var beðinn um að segja skipstjóra Ostrovets að sigla á fullri ferð í átt að landi. Þar næst hafði stjórnstöð Landhelgisgæslunnar samband við lækni í áhöfn TF-LIF og lét hann vita um ástand mannsins.  Varðskipið Óðinn var við eftirlit á svæðinu og fóru tveir stýrimenn og tveir hásetar frá Óðni um borð í Ostrovets og hlúðu að skipverjanum og undirbjuggu hann undir flutning með þyrlu.   TF-LIF fór í loftið kl. fjögur og fékk fylgd þyrlu varnarliðsins þar sem um svo langa vegalengd var að ræða. Þegar þyrlurnar komu að skipinu var það statt 240 sjómílur frá Reykjavík. Vel gekk að hífa manninn um borð og að sögn Magnúsar Arnar Einarssonar, stýrimanns/sigmanns í áhöfn þyrlunnar, var mikill munur að hafa skipverja frá Óðni um borð í Ostrovets til að aðstoða við hífinguna. Það flýtti fyrir því þá þurfti sigmaður ekki að fara niður í skipið til að undirbúa hífinguna. Það skipti einnig máli vegna flugþols þyrlunnar en þetta sjúkraflug var í lengsta lagi. Samkvæmt upplýsingum frá Ostrovets er hinn slasaði 29 ára karlmaður frá Rússlandi en flestir í áhöfn skipsins eru Rússar. Áhöfn TF-LIF hafði náð hinum slasaða um borð um sexleytið í morgun og kom þyrlan til Reykjavíkur kl. 8:20 og var hinn slasaði fluttur á Landspítala - Háskólasjúkrahús í Fossvogi.  Eins og fram hefur komið í fréttum er togarinn Ostrovets eitt af sjóræningjaskipunum sem fjallað hefur verið um í fréttum.  Meðfylgjandi myndir tók Sverrir Erlingsson flugvirki/spilmaður í áhöfn TF-LIF er komið var að togaranum í nótt. Sjá má varðskipið Óðin við hlið togarans og ein myndin er af þyrlu Varnarliðsins sem fylgdi TF-LIF til öryggis.  Myndina inni í TF-LIF tók Magnús Einarsson stýrimaður af lækni og flugvirkja að störfum.