Þrettán akreinar á kafla

Framkvæmdir við breikkun gatnamóta Kringlumýrarbrautar og Miklubrautar eru nýhafnar og hafa íbúar höfuðborgarsvæðisins væntanlega ekki farið varhluta af þeim í gær. Til stendur að breikka Kringlumýrarbraut frá Listabraut í suðri að Háaleitisbraut í norðri og Miklubrautina frá göngubrúnni við Kringluna í austri og Lönguhlíð í vestri. Við gatnamótin sjálf verða sex akreinar í hverja átt, þrjár fyrir þá sem aka beint yfir gatnamótin, tvær fyrir vinstribeygjur og ein fyrir hægribeygjur. Á kafla bætist svo þrettánda akreinin við sem verður sérakrein fyrir strætisvagna á akbraut austur Miklubraut. Gert er ráð fyrir að einhverjar tafir geti orðið á umferð á verktímanum en þó er reynt að búa þannig um hnútana að þær verði sem minnstar. Til stendur að framkvæmdum og frágangi verði lokið að fullu þann 29. ágúst. Verkefnið er samstarfsverkefni Vegagerðar ríkisins og Framkvæmdasviðs Reykjavíkurborgar.