Gámurinn kominn á land

Búið er að hífa ammóníaksgáminn úr Lagarfossi og á land í Grundartangahöfn. Tíu eiturefnakafarar frá slökkviliði höfuðborgarsvæðisins eru á staðnum til að tryggja öryggið. Breyting varð á vindáttinni sem gerði að verkum að slökkviliðið þurfti aðeins að breyta vinnulagi sínu við aðgerðina. Höskuldur Einarsson vettvangsstjóri segir að megn ammóníakslykt sé af gámnum. Leki kom að gámnum þegar skipið var skammt undan Skotlandi en siglingu þess var haldið áfram eftir að tryggt var að búið væri að komast í veg fyrir lekann. Slökkviliðið á Akranesi óskaði eftir aðstoð félaga sinna á höfuðborgarsvæðinu og var tugur sérþjálfaðra manna sendur að Grundartanga í morgun. Ákveðið var að láta skipið leggjast að bryggju við Grundartanga vegna hagstæðrar vindáttar og var bryggjan rýmd á meðan á aðgerðum stendur. Hægt er að hlusta á Ingólf Bjarna Sigfússon, fréttamann Stöðvar 2 og Bylgjunnar, tala frá Grundartangahöfn með því að smella á hlekkinn hér að neðan.