Opnar umræður um stjórnarskrána

Stjórnarskrárnefnd, sem stýrir endurskoðun stjórnarskrár lýðveldisins, heldur í dag opið málþing um stjórnarskrána.  Á málþinginu fá þau félagasamtök sem sent hafa erindi til stjórnarskrárnefndar, alls 21 að tölu, tækifæri til að rökstyðja hugmyndir sínar og ræða við nefndarmenn, að sögn Páls Þórhallssonar, ritara nefndarinnar. Ráðstefnan er haldin á Hótel Loftleiðum og stendur frá kl. 9 til 17. Meðal félagasamtakanna sem sent hafa inn erindi vegna endurskoðunar stjórnarskrárinnar eru Frjálshyggjufélagið, Hið íslenska félag áhugamanna um stjórnskipan, Landvernd, Mannréttindaskrifstofa Íslands, Mannvernd, Náttúruvaktin, Reykjavíkurakademían, Samband ungra sjálfstæðismanna, Samtök herstöðvaandstæðinga, Siðmennt, Skýrslutæknifélag Íslands, Undirbúningshópur kvenna um stjórnarskrárbreytingar, Þjóðarhreyfingin og Öryrkjabandalag Íslands.