Líkur sagðar á framsali Mladic

Ratko Mladic, fyrrverandi hershöfðingi Bosníu-Serba, kann að verða framseldur til stríðsglæpadómstólsins í Haag bráðlega, að því er aðstoðarutanríkisráðherra Bandaríkjanna lét hafa eftir sér í gær. Hann boðaði ennfremur að Bandaríkjastjórn hygðist aflétta frystingu tíu milljóna dala greiðslu sem hún hafði áður samþykkt að veita til uppbyggingar í Serbíu og Svartfjallalandi. "Það er einlæg von okkar að Serbía muni nú taka síðustu skrefin sem nauðsynleg eru til að fá Mladic hershöfðingja sendan til Haag þar sem hann verði látinn svara til saka fyrir þá glæpi sem hann stýrði er 8.000 karlmenn og drengir voru myrtir í Srebrenica," sagði Nicholas Burns, einn aðstoðarutanríkisráðherra Bandaríkjanna, eftir viðræður við fulltrúa Serbíustjórnar í Belgrad í gær. Í janúar síðastliðnum hafði Bandaríkjaþing ákveðið að frysta skyldi tíu milljóna hjálpargreiðslu til Serbíu vegna meintrar ófullnægjandi samvinnu ráðamanna þar við stríðsglæpadómstólinn í Haag. Síðan þá hafa nokkrir Serbar verið framseldir til dómstólsins.