Félagsmönnum mismunað

Framkvæmdastjóri Heyrnar- og talmeinastöðvar Íslands vill láta endurskoða reglugerðir um sjúkrasjóði stéttarfélaganna, þannig að aðstoð þeirra nái til félagsmanna sem horfnir eru af vinnumarkaði sakir aldurs. Ellilífeyrisþegi, sem verið hafði í Eflingu, sótti um aðstoð úr sjúkrasjóði félagsins til kaupa á heyrnartæki sem kostaði hann um 100 þúsund krónur. Honum var hafnað þar sem hann væri hættur að vinna. "Auðvitað er það sárt þegar menn eru búnir að borga í þessa sjóði í 30 ár, en hafa svo minna milli handanna, og leita þá eftir aðstoð," sagði Guðrún. "Þarna er hópur sem á peninga þarna inni en hefur ekki lengur rétt á að sækja um þá. Breyttar reglugerðir hér gera það að verkum að einstaklingar eru að borga heldur meira í heyrnartækjunum sínum en áður. Miðað við nágrannalöndin, þá eru þeir að borga mun meira." Guðrún sagði að kaup á heyrnartækjum væru talsverð fjárfesting fyrir fólk. Langstærstur hluti þeirra sem notuðu þau væri ekki lengur á vinnumarkaði. Um 50 prósent sem kæmu á stöðina væru 75 ára og eldri.