Tillaga um minni þorskkvóta

  Hafrannsóknastofnunin leggur til að dregið verði úr þorskveiðum um sjö þúsund tonn á næsta fiskveiðiári. Í fyrra lagði stofnunin til að þorskaflinn yrði 205 þúsund tonn en leggur til 198 þúsund tonna aflahámark nú. Fram kemur í skýrslu stofnunarinnar um nytjastofna og aflahorfur á næsta fiskveiðiári að nýliðun í þorskstofninum hafi verið undir væntingum mörg undanfarin ár og enn sjáist ekki umtalsverð batamerki þótt hrygningarstofninn sé tekinn að stækka. Talið er að ef þorskur verði veiddur samkvæmt núgildandi aflareglu séu töluverðar líkur á að hrygningarstofninn fari aftur minnkandi. Að mati Hafrannsóknastofnunarinnar hafa verið veidd um 30 prósent af stofninun á ári undanfarin 10 ár. Yfirgnæfandi líkur eru taldar á að hrygningarstofninn vaxi ef þetta hlutfall verður lækkað niður í 20 prósent og af þeim sökum ætlar stofnunin að fara fram á breytingar á aflareglu með það í huga að lækka veiðihlutfallið. Ástand ýsustofnsins er talið gott og athygli vekur afar sterk nýliðum og aukin útbreiðsla. Því er lagt til að aflahámark verði 105 þúsund tonn en stofnunin lagði til 90 þúsund tonna hámark í fyrra. Miðað við aflareglu mætti veiða allt að 140 þúsund tonn. Hafrannsóknastofnunin telur hins vegar að flotinn muni forðast að veiða smæsta og yngstu ýsuna þótt hún sé komin inn í veiðistofninn auk þess sem búast megi við að skyndilokanir verði fleiri. Ástand ufsa er viðunandi að mati stofnunarinnar og er mælt með fimm þúsund tonna aukningu aflahámarks eða 80 þúsund tonnum. Grálúðuafli á sóknareiningu hefur minnkað um 50 prósent undanfarin ár og benda mælingar til að stofninn sé í sögulegu lágmarki. Lagt er til 15 þúsund tonna aflahámark. Engin breyting verður á steinbíts- og síldveiðum samkvæmt tillögunum. Hafrannsóknastofnunin leggur til að einungis verði heimilt að veiða 10 þúsund tonn af úthafsrækju samanborið við 15 þúsund á yfirstandandi fiskveiðiári. Að mati fiskifræðinganna eru jákvæðar fréttir þær að ýsa, ufsi og skötuselur séu í vexti og kolmunni og norsk-íslenska síldin sýni sig nær landinu. Horfurnar séu aftur á móti ekki eins góðar varðandi þorsk, rækju, loðnu, grálúðu og karfa.