Straumur fólks út á land

"Við vitum ekkert hvert við ætlum að fara á þessari stundu en þannig eru líka skemmtilegustu ferðalögin," sögðu þeir Hörður Unnarsson og Jóhann Arnórsson, sem voru í hópi þeirra þúsunda höfuðborgarbúa sem héldu úr bænum um helgina. Gekk umferðin engu að síður vel fyrir sig og höfðu engin teljandi óhöpp orðið þessa fyrstu stóru ferðahelgi ársins þegar blaðið fór í prentun. Hörður sagði þá félaga búna undir hvað sem er enda með gott tjald, góða svefnpoka og annað sem máli skipti í útilegum. "Við gætum endað fyrir norðan land eða endað í Borgarfirði. Það veltur á því í hvernig skapi við erum á leiðinni og hvort við sjáum eitthvað skemmtilegt sem er þess virði að kanna nánar. Þetta höfum við gert áður og alltaf haft gaman af." Áfangastaðir voru af ýmsu tagi hjá öðrum ferðalöngum sem Fréttablaðið náði tali af. Laugavatn og Borgarfjörður heilluðu marga og talsverður straumur af fólki var norður á Akureyri. Þó var mat það mat afgreiðslufólks á bensínstöðvum að umferð fólks út á land væri minni en oft áður um þessa helgi. Helgarspá Veðurstofu Íslands er sæmileg fyrir allt landið en þó er hætta á slydduélum eða skúrum norðaustanlands. Ráð er fyrir gert að hitastig verði frá fjórum stigum og allt að sextán og hlýjast suðvestanlands.