Haldið sofandi í öndunarvél

Karlmaður um tvítugt er alvarlega slasaður og í öndunarvél eftir bílslys við Grindavík í gærkvöldi. Bílstjórinn og tveir aðrir farþegar slösuðust einnig.  Slysið varð á Austurvegi í Grindavík um klukkan ellefu í gærkvöldi. Bíl sem fernt var í var ekið á ljósastaur. Allir sem í bílnum voru, tveir karlar og tvær konur, voru fluttir á slysadeild Landspítalans í Fossvogi. Annar karlanna, farþegi í framsæti bifreiðarinnar, slasaðist mjög alvarlega og liggur hann nú á gjörgæsludeild Landspítalans. Honum er haldið sofandi í öndunarvél. Hin þrjú eru enn á sjúkrahúsi en eru ekki talin alvarlega slösuð. Fólkið í bílnum var á aldrinum sautján ára og upp í tvítugt og að sögn lögreglu leikur grunur á hraðakstri. Bíllinn er gjörónýtur.