Misjafnt verð innan verslanakeðja

Hátt á annað þúsund prósenta verðmunur er á milli verslana samkvæmt nýrri verðkönnun. Þá er verð mismunandi á milli verslana í sömu keðju eftir staðsetningu á landinu. Alþýðusamband Íslands gerði verðkönnunina um landið allt 25. maí. Hún náði til 63 verslana og var meðal annars farið í keðjubúðir sem eru með útibú víða um land. Þar kom meðal annars fram að ósamræmi var í verði eftir staðsetningu. Þetta átti aðallega við um Samkaup-Úrval þar sem ósamræmi var í verði á milli verslana í 18 af 20 tilvikum. Í 17 tilvikum var um slíkt að ræða hjá Krónunni, hjá Samkaupum-Strax í 14 tilvikum og í verslunum Bónus og Kaskó í 10 tilvikum. Gríðarlegur verðmunur reyndist vera í mörgum flokkum en þó hvergi eins mikill og á kílóverði af gulrótum. Í verslun 10-11 kostaði kílóið 698 krónur en í Bónus 45 krónur. Þetta er hvorki meira né minna en 1450 prósenta munur. Meira en 100 prósenta munur var á hæsta og lægsta verði allra vara í könnuninni og meira en 200 prósenta munur var á 13 af 20 vöruflokkum. Í könnuninni var einungis um beinan verðsamanburð að ræða en ekki lagt mat á gæði eða þjónustu verslana.