Borgarstjóraefni í áttunda sæti

Vangaveltur eru uppi um að áttunda sæti Reykjavíkurlistans verði skipað borgarstjóraefni listans. Nafn núverandi borgarstjóra hefur verið nefnt en hvorugur borgarfulltrúa hafa ákveðið hvort þau fari fram. Samfylkingin heldur prófkjör við val á fulltrúum sínum. "Það er regla hjá Samfylkingunni að það fari fram prófkjör um frambjóðendur flokksins og svoleiðis verður það í Reykjavík fyrir komandi borgarstjórnarkosningar," segir Páll Halldórsson, fulltrúi Samfylkingarinnar í viðræðunefnd R-listaflokkanna. Hann segir að þátttaka Samfylkingarinnar í R-listanum ráði ekki úrslitum hvað slíkt varðar og haldið verði prófkjör hvort sem Samfylkingin bjóði fram í eigin nafni eða undir nafni R-listans. Stefán Jón Hafstein borgarfulltrúi hlaut efsta sætið í síðasta prófkjöri Samfylkingarinnar í Reykjavík til borgarstjórnarkosninga, Steinunn Valdís Óskarsdóttir borgarstjóri hlaut annað sætið og Helgi Hjörvar hið þriðja. Ingibjörgu Sólrúnu var svo úthlutað áttunda sæti listans. Hvorki Stefán Jón né Steinunn Valdís vildu segja til um hvort þau myndu taka þátt í prófkjöri til komandi borgarstjórnarkosninga og ekki náðist í Helga Hjörvar en talið er að hann muni ekki gefa kost á sér frekar en Ingibjörg Sólrún. Fleiri kunna að blanda sér í prófkjörsbaráttu en uppi eru skiptar skoðanir innan Samfylkingarinnar hvort flokkurinn eigi að taka þátt í R-lista samstarfinu. Slík sjónarmið munu reyndar vera innan allra hinna þriggja flokka. Raddir innan Samfylkingarinnar benda á að algjörlega ósættanlegt sé fyrir Samfylkinguna að fallast á jafna skiptingu borgarfulltrúa vegna stærðar flokksins en algjört skilyrði verði af hálfu flokksins að hann fái borgarstjórastólinn eða fyrsta sæti listans. Meðal þess, sem nefnt hefur verið, er að Steinunn Valdís feti í fótspor forvera síns Ingibjargar Sólrúnar Gísladóttur og skipi áttunda sæti listans og verði þar með borgarstjóraefni listans ef um slíkt næðist sátt innan Reykjavíkurlistans. Búist er við því að prófkjör Samfylkingarinnar verði haldið í haust.