Halldór andvígur ljósmyndasýningu

Halldór Blöndal, forseti Alþingis, sendi Steinunni V. Óskarsdóttir borgarstjóra í Reykjavík, í gær bréf þar sem hann mótmælir því að Reykjavíkurborg noti Austurvöll undir ljósmyndasýningu á. Halldór setti álíka mótmæli fram í fyrra. Eiríkur Hjálmarsson, aðstoðarmaður borgarstjóra, sagði í samtali við Fréttablaðið að skoðun þingforseta hefði verið þekkt þegar undirbúningur að sýningunni hófst. "Erindi hans verður að sjálfsögðu svarað, en ég á ekki von á að borgaryfirvöld breyti fyrri afstöðu." Sömu steinstöplar verða undir ljósmyndunum og á síðasta ári. Kristján B. Jónasson, þróunarstjóri hjá Eddu, lýsti furðu sinni á því að þetta kæmi upp núna. "Ég hélt að borgin og þingið hefðu útkljáð þetta sín á milli og hefði viljað vitað af þessari andstöðu fyrr." Hann sagði ennfremur að Edda hefði einungis fengið góð viðbrögð fá almenningi vegna sýningarinnar í fyrra. Sýning sumarsins er "Andlit Norðursins" eftir Ragnar Axelsson (Rax) sem gaf út samnefnda bók fyrir síðustu jól. Hún hefst þann 24. júní. Þannig hljóðar póstur Halldórs: "Mér hefur verið tjáð að ákveðið sé þriðja sumarið í röð að stilla upp fyrirferðarmiklum og grófum steinstöplum á Austurvelli, þar sem ljósmyndum skuli komið fyrir. Ég hef áður látið í ljós þá skoðun mína, að mér finnist óviðeigandi að Austurvöllur sé notaður með þessum hætti sem sýningarsvæði svo mánuðum skiptir.Ég fer enn fram á, að Reykjavíkurborg endurskoði afstöðu sína og finni sýningum sem þessum viðeigandi stað.Óhjákvæmilegt er að taka fram, að í þessum orðum felst ekki gagnrýni á þá listamenn, sem ljósmyndirnar eiga."