Vilja minnka kolmunnaveiðar

Sjávarútvegsráðherrar ríkja við norðaustanvert Atlantshaf vilja draga úr kolmunnaveiðum í Norður-Atlantshafi þegar á þessu ári. Þetta kom fram að loknum fundi þeirra í Færeyjum í gær. Í tilkynningu frá sjávarútvegsráðuneytinu kemur fram að fundurinn hafi lagt áherslu á að allar veiðiþjóðirnar á svæðinu yrðu að leggja sitt af mörkum til að takmarka aflann í ár. Samkomulag náðist um að þjóðirnar myndu ákveða fyrir lok júnímánaðar hvort gripið yrði til veiðitakmarkana á þessu ári. Ákveðið var að halda fund í Brüssell síðar í þessum mánuði þar sem rædd yrði veiðistjórn til lengri tíma. Jafnframt var samþykkt að koma á sérstökum vinnuhópi til að ákvarða hvernig veiðum á kolmunna verði best háttað í framtíðinni. Fundinn í Færeyjum sóttu sjávarútvegsráðherrar Færeyja, Íslands og Noregs og auk þess háttsettir embættismenn frá Kanada og Rússlandi.