Barist um sæti Vinstri-grænna

Búist er við því að fleiri en núverandi borgarfulltrúar Vinstri-grænna í Reykjavík munu blanda sér í slaginn ef flokkurinn efnir til prófkjörs í Reykjavík fyrir komandi borgarstjórnarkosningar. Borgarfulltrúarnir Árni Þór Sigurðsson og Björk Vilhelmsdóttir geta því átt von á að keppt verði um sæti þeirra ef þau ákveða að gefa kost á sér að nýju. Meðal þeirra sem nefnd hafa verið eru þau Katrín Jakobsdóttir, varaformaður Vinstri-grænna, Svandís Svavarsdóttir, formaður Vinstri-grænna í Reykjavík og Grímur Atlason, stjórnarmaður Vinstri-grænna í Reykjavík. "Stjórn félagsins hefur ákveðið að það fari fram forval við val á fulltrúum á framboðalistann og það er óháð því hvort að af samstarfinu við R-listann verður eða ekki. En slíkt á eftir að leggja fyrir félagsfund," segir Þorleifur Gunnarsson, varaformaður Vinstri-grænna í Reykjavík. Hann segir að ef um prófkjör verði að ræða verði það lokað prófkjör og þannig aðeins fyrir flokksmenn en slíkt eigi eftir að útfæra nánar. Viðræðunefnd R-listaflokkanna fundar í dag en enn er ekki ljóst hvort Vinstri-grænir muni taka þátt í R-lista samstarfinu. Vitað er að óformleg tillaga Framsóknar um að hver hinna þriggja flokka fái tvo fulltrúa á listann og fyrsta og áttunda sætið verði valið með öðrum hætti, hefur skapað umræðu sem leggst misvel í flokkana. Vinstri-grænir eru sagðir geta sæst á slíka tillögu en vilja fá annað úr býtum ef borgarstjóraefni listans verður frambjóðandi úr röðum Samfylkingarinnar og áttunda sætið framsóknarmaður. Meðal þess sem lauslega hefur verið nefnt er að bjóða Vinstri-grænum forystuhlutverk í stjórn Orkuveitu Reykjavíkur þar sem erfitt geti verið fyrir Framsóknarflokkinn að halda forystunni í Orkuveitunni vegna harðrar andstöðu Vinstri-grænna við orkusölu fyrirtækisins til stóriðju.