Segir rangfærslur í grein um lónið

Framkvæmdastjóri Bláa lónsins er afar ósáttur við umfjöllun blaðakonunnar Susan d'Arcy í The Sunday Times um helgina, sem segir lónið meðal ofmetnustu ferðamannastaða heims. Í umfjölluninni fær Bláa lónið harkalega útreið og það ekki sagt vera sá sælustaður sem auglýstur er. Blaðakonan segir þrengsli og táfýlu vera í búningsklefunum. Þá segir hún alla vellíðan hafi horfið eins og dögg fyrir sólu þegar hún steig ofan í og tolldi hún ekki lengur við en í fimm mínútur. Hún efast um hreinleika lónsins og telur sig hafa lesið úr augnaráði eins gestanna að hann hafi verið að míga í lónið. Grímur Sæmundsen, framkvæmdastjóri Bláa lónsins, segir að lóni sé heimsþekkt og forsvarsmenn þess verði að takast á við það jákvæða og neikvæða sem því fylgi. Blaðamaðurinn upplifi lónið ekki með jákvæðum hætti en ekki sé hægt að stjórna upplifun hvers og eins einasta gests sem komi í lónið, en 354 þúsund gestir hafi heimsótt það í fyrra. Hins vegar sé blaðakonan með hreinar rangfærslur, sérstaklega um uppruna jarðsjávarins. Þá sé hún með persónulegar hugleiðingar sem séu ekki við hæfi. Grímur segir blaðkonuna hafa lýst uppruna vatnsins í lóninu eins og um gamla lónið væri að ræða þegar affall frá orkuveitunni í Svartsengi var notað. Nú kemur sjórinn hins vegar beint úr iðrum jarðar með lögnum 160 gráðu heitur og er blandaður á nokkrum stöðum í lóninu. Í framhaldi af þessum rangfærslum bendir Grímur á að í gær hafi komið tölvupóstur frá blaðakonunnin þar sem hún meðal annars spyr um upptök lónsins, degi eftir að grein hennar birtist. Hún leitaði sem sagt upplýsinga eftir á. Grímur segir hreinlæti í lóninu ekki ábótavant og bendir að það hafi fengið Bláfánann, sem er hreinlætisvottun frá Evrópusambandinu, þrjú ár í röð. Ssex milljónum lítra af jarðsjó sé skipt út á 40 klukkustunda fresti þannig að allt lónið endurnýi sig á þeim tíma. Grímur segir sumar athugasemdir blaðakonunnar þekktar eins að búningsklefarnir séu helst til þröngir þegar mikið er að gera. Hann segir hins vegar lónið ekki yfirfullt af fólki enda er það 5000 fermetrar og því eigi allir að geta fundið sér stað til afslöppunnar.