Frestur borgar felldur úr gildi

Reykjavíkurborg fær ekki lengri frest til að ákveða hvernig rekstri Upplýsingamiðstöðvar ferðamála verður háttað. Samkeppnisráð hafði veitt borginni frest fram í október en áfrýjunarnefnd hefur fellt úrskurðinn úr gildi. Ferðaþjónusta Reykjavíkur ehf. kvartaði til Samkeppnisstofnunar vegna starfsemi Upplýsingamiðstöðvar ferðamála í Reykjavík, en hún er rekin af Höfuðborgarstofu Reykjavíkurborgar. Upplýsingamiðstöðin nyti þannig fjárframlaga frá borginni auk styrkja frá ferðamálayfirvöldum og taldi Ferðaþjónusta Reykjavíkur því að verið væri að niðurgreiða starfsemina. Samkeppnisráð komst að þeirri niðurstöðu að þetta fyrirkomulag væri skaðlegt samkeppni og beindi þeim til mælum til borgarinnar að bjóða rekstur Upplýsingamiðstöðvarinnar út. Borgarlögmaður óskaði eftir framlengdum fresti til þess og var hann veittur til 1. október. Ferðaþjónusta Reykjavíkur áfrýjaði þeim fresti til áfrýjunarnefndar samkeppnismála sem felldi frestinn úr gildi. Nefndin taldi rök borgarlögmanns um að Reykjavíkurborg hefði ekki ákveðið hvort starfsemi Upplýsingamiðstöðvarinnar yrði boðin út eða starfsemin aðskilin fjárhagslega og hvað varðar stjórnun ekki málefnaleg.