Steingrímur væntir góðs samstarfs

Steingrímur J. Sigfússon, formaður Vinstri - grænna, óskar Ingibjörgu Sólrúnu Gísladóttur til hamingju með mjög afgerandi sigur í formannskjöri í gær. Hann fagnar því sérstaklega að nýr formaður vilji stilla saman strengi stjórnarandstöðunnar og fella núverandi ríkisstjórn. Steingrímur væntir góðs samstarfs og er bjartsýnn á árangursríkt samstarf. Steingrímur telur ótímabært að vera með útlistanir á hugsanlegum áherslubreytingum. Það eigi eftir að koma í ljós á næstu mánuðum og best að Samfylkingarfólk tali fyrir sig sjálft í þeim efnum. Spurður um ummæli Halldórs Ásgrímssonar forsætisráðherra að Ingibjörg Sólrún sé óskoraður leiðtogi stjórnarandstöðunnar segir Steingrímur að það sé ekki í valdi ráðherrans að tilnefna í slík embætti sem þar á ofan séu ekki til. „Aðalatriðið er auðvitað að menn nái að vinna vel saman og ég held að Halldóri Ásgrímssyni muni ekki takast að spila með það,“ segir Steingrímur.