Gætu unnið náið saman

Baldur Þórhallsson stjórnmálafræðingur segir að pólitísk framtíð þess sem verður undir í formannskjöri Samfylkingarinnar ráðist meðal annars af því hversu afgerandi úrslitin verða. Ef það verður mjótt á mununum gæti orðið um nánari samvinnu að ræða. Hann segir litla þátttöku í kosningunum skýrast af því að fleiri séu skráðir í stjórnmálaflokka en kæri sig um. Kosningaþátttakan hjá Samfylkingunni er fremur lítil að margra mati eða tæp 60 prósent. Fjórtán þúsund félagar voru í Samfylkingunni fyrir en eru nú tuttugu þúsund. Sex þúsund bættust við vegna formannskjörsins en einungis rétt rúmur helmingur kaus. Baldur Þórhallsson segir að kosningarannsóknir og skráningartölur flokka sýni að það séu mun fleiri skráðir í íslenska stjórnmálaflokka hlutfallslega en annars staðar á Norðurlöndum. Þetta komi til vegna þess að fjöldi Íslendinga taki þátt í prófkjörum og sé þannig skráður í flokkana án þess að vilja það. Hann telji því að stór hópur fólks sem viti ekki að hann sé í stjórnmálaflokki eða kæri sig ekki um það. Hvað skyldu úrslitin í formannskosningunni bera í skauti sér fyrir þann sem tapar? Er hægt að hugsa sér að annað þeirra geti lifað sínu pólitíska lífi í skugga hins? Baldur bendir á Þorsteinn Pálsson hafi verið ráðherra í fjölda ára eftir að hafa tapað í formannsslag fyrir Davíð Oddssyni. Össsur og Ingibjörg verði væntanlega bæði í forystusveit flokksins áfram. Hins vegar telji að hann ef svo færi að Össur myndi vinna myndi skapast mikill óróleiki meðal stuðningsmanna Ingibjargar Sólrúnar. Hún hafi af mörgum verið talin erfðaprins flokksins og allar skoðanakannanir sýni að hún hafi mun meira fylgi meðal stuðningsmanna Samfylkingarinnar en Össur. Líklega kæmu fram ásakanir um nokkuð sérkennilega smölun í flokkinn ef Össur ynni og það gæti skapast heilmikill óróleiki meðal stuðningsmanna hennar. Aðspurður hver áhrifin verði á pólitískt líf Ingibjargar og Össur ef úrslitin verði mjög afgerandi segir Baldur að ekki sé óeðlilegt að ætla að það þeirra sem tapi dragi sig til hlés í umræðunni en hann sjái fyrir sér að þau geti bæði verið áfram í forystusveit flokksins.