Lífstíðarfangelsi komi til greina

Bjarni Benediktsson alþingismaður, sem ekki hefur viljað samþykkja frumvarp um afnám fyrningar kynferðisbrota óbreytt, segir aðra leið mögulega, það er að breyta refsiramma þannig að alvarlegustu brotin varði lífstíðarfangelsi. Bjarni, sem er formaður allsherjarnefndar, lét þessi orð falla í Reykjavík síðdegis á Bylgjunni í gær. Þar benti hann á að til væru aðrar leiðir en þær að taka fyrningarregluna sjálfa til skoðunar til að ná fram markmiði frumvarpsins. Það mætti gera það með því setja alvarlegustu brotin af þessu tagi í sama flokk og önnur alvarlegustu brotin sem hegningarlögin fjölluðu um, þ.e. að það varðaði ævilöngu fangelsi að fremja slík brot. Aðspurður hvort hann væri talsmaður þess sagði Bjarni að hann gæti vel séð þessa breytingu fyrir sér. Honum fyndist þó langmikilvægast, eins og meirihluti allsherjarnefndar hefði lagt til í sínu áliti um frumvarpið, að breytingin færi fram samhliða heildarskoðun á kynferðisbrotakafla hegningarlaga þannig að menn væruu ekki að tína rúsínur úr tebollu án þess að taka allt málið til skoðunar í heild sinni. Ágúst Ólafur Ágústsson, þingmaður Samfylkingarinnar, lagði fram frumvarpið um afnám fyrningar kynferðisbrota og segir hann hugsanlegt að fara þessa leið sem Bjarni talar um en segir að slíkt verði að skoða vandlega. Það sé mjög stórt skref að láta einhver brot varða lífstíðarfangelsi, en það sé algengur misskilningur að lífstíðarfangelsi sé ekki til á Íslandi. Samkvæmt lögum sé það til þótt enginn hafi verið dæmdur í slíkt í Hæstarétti. Ævilangt fangelsi þýði ekki 16 ára fangelsi eins og margir halda þannig ræða verði máli mjög vel. Ágúst segir að aðalatriðið í huga sínum á þessu stigi sé að gera kynferðisbrot ófyrnanleg til þess að barnaníðingar njóti ekki þess aðstöðumunar sem þeir hafi gagnvart börnum og í kjölfarið þyngja refsingar, hvort sem það verði í lífstíðarfangelsi eða 16 ár. Það verði að ræða.