Aðeins 6,5% gerða í íslensk lög

Aðeins 6,5 prósent af tilskipunum og öðrum gerðum Evrópusambandsins hafa verið tekin inn í íslensk lög. Andstæðingar Evrópusambandsaðildar á Alþingi segja þessar upplýsingar afhjúpa þá blekkingu að Íslendingar þyrftu með EES-samningnum að innleiða 80 prósent af reglugerðaverki Evrópusambandsins. Í skriflegu svari utanríkisráðherra við fyrirspurn Sigurðar Kára Kristjánssonar sem dreift var á Alþingi í morgun kemur fram að á tíu ára timabli frá 1994 til 2004 samþykkti Evrópusambandið tæplega 39 þúsund tilskipanir, reglugerðir og ákvarðanir. Af þeim voru um 2.500, eða 6,5 prósent, teknar inn í EES-samninginn og þar með íslensk lög. Í svari ráðherra kemur fram að langstærstur hluti þeirra gerða sem Evrópusambandið samþykkir fjalli um landbúnað og sjávarútveg sem eru utan EES-samningsins. Fyrirspyrjandi taldi ástæðu til að vekja sérstaka athygli á þessum upplýsingum við upphaf þingfundar í morgun enda kæmu þær verulega á óvart. Hann benti á að málflutningur Evrópusinna bæði innan þings og utan hefði verið sá að Íslendingar innleiddu 80 prósent af öllum lögum Evrópusambandsins án þess að gerðir væru neinir fyrirvarar á því. Það sem kæmi á óvart í þessum máli væri það að það stæði ekki steinn yfir steini í áróðri Evrópusinna fyrir aðild Íslendinga að Evrópusambandinu á síðustu 10-11 árum. Íslendingar stimpluðu ekki neinar gerðir í þeim mæli sem haldið hefði verið fram á Alþingi. Evrópusinnar sögðu þessar upplýsingar engu breyta um sannfæringu sína fyrir því að sækja um aðild sem allra fyrst. Björgvin G. Sigruðsson, þingmaður Samfylkingarinnar, spurði hver viðbrögð Íslendingar ættu að vera þegar Norðmenn sæktu um aðild að Evrópusambandinu í þriðja sinn og þegar EES-samningurinn liði þar með undir lok.