Frumvarpi um RÚV frestað

Stjórnarfrumvarp um Ríkisútvarpið verður saltað, sem og vatnalög, með samkomulagi sem stjórn og stjórnarandstaða á Alþingi náðu í dag um lok þingstarfa. Þegar stjórnarliðið hélt til þingflokksfunda í hádeginu lá í loftinu að þar yrði rætt um að gefa eftir gagnvart stjórnarandstöðunni. Við blasti að Þorgerður Katrín Gunnarsdóttir menntamálaráðherra yrði að þola það að frumvarpi hennar um Ríkisútvarpið sf. yrði fórnað. Frumvarp Valgerðar Sverrrisdóttur um ný vatnalög var einnig ofarlega á skotlista stjórnarandstöðu og fór svo að þeim var báðum slátrað með samkomulagi sem náðist á þessum fundi sem forseti Alþingis, Halldór Blöndal, hélt með formönnum þingflokka um miðjan dag.Langur listi þingmála lá fyrir en þarna var innsiglað hver skyldu ná í gegn og hver ekki. Samið var um að umræðu um samkeppnislögin lyki fyrir kvöldmat og að samgönguáætlun yrði rædd í kvöld en þau mál eru bæði á grænu ljósi. Margrét Frímannsdóttir, þingflokksformaður Samfylkingarinnar, segir að samfylkingarfólk hafi lagt áherslu á það að fresta samkeppnislögum en að stjórnin hafi þau mál sem forgangsmál. Þá hafi Samfylkingin einnig viljað fresta lögum um Ríkisútvarpið og hún vilji að mál stofnunarinnar verði rædd með fjölmiðlalögum í haust. Helst vilji flokkurinn að þverpólitísk nefnd starfi í sumar og endurvinni frumvarpið um RÚV með tilliti til skýrslu fjölmiðlanefndar. Margrét segir enn fremur að vatnalögin snúist um einkavæðingu á vatnsauðlindum og þingmenn Samfylkingarinnar séu mjög ánægðir með að þessi illa unnu frumvörp skuli liggja. Aðspurður hvor stjórnarliðinu hefði ekki verið í lófa lagið að keyra öll málin í gegn með þolinmæði, jafnvel þótt það tæki nokkra daga í viðbót, segir Halldór Blöndal, forseti Alþingis, að auðvitað sé hægt að halda áfram þinghaldi til vors en það hafi oft gerst að stjórnarflokkarirnir hafi tekið tillit til helstu óska stjórnarandstöðu þegar svona standi á. Aðspurður hvort stjórnarliðum sé ekki sárt að missa Ríkisútvarpsfrumvarpið spyr Halldór af hverju þeim ætti að vera það. Margrét segir að Samfylkingarþingmenn hafi verið búnir að búa sig undir þá umræðu og að hún hefði orðið mjög löng vægast sagt. Þetta þýðir að nú er hægt að setja færibandið í gang og það á fulla ferð enda veitir ekki af. Þar sem morgundagurinn er lagður undir fyrirspurnir og eldhúsdagsumræður verður það verkefni miðvikudagsins að afgreiða frá Alþingi yfir 40 lagafrumvörp áður en þingmenn komast heim í sumarleyfi.