Fóru yfir skiptingu vegafjár

Áhugi þingmanna höfuðborgarsvæðisins á vegamálum virðist hafa vaknað. Fimm ráðherrar ríkisstjórnarinnar, þeirra á meðal forsætis- og fjármálaráðherra, svo og leiðtogi stærsta stjórnarandstöðuflokksins, mættu allir á skrifstofu vegamálastjóra í dag til að fara yfir skiptingu vegafjár á höfuðborgarsvæðinu. Vegagerðin fundaði fyrr í dag með þingmönnum Suðvesturkjördæmis og nú síðdegis með þingmönnum Reykjavíkurkjördæmanna. Í gegnum tíðina hafa þingmenn dreifbýliskjördæma sinnt þessum kjördæmafundum með vegamálastjóra mun betur en Reykjavíkurþingmenn en þessi áhugi æðstu ráðamanna bendir til að nú sé að verða breyting þar á.