Díselolía verður dýrari en bensín

Lítrinn af díselolíu mun kosta meira en bensínlítri eftir breytingar á lögum um olíugjald og kílómetragjald sem taka gildi 1. júlí. Geir Haarde fjármálaráðherra segir það þó væntanlega aðeins verða tímabundið, verðið á díselolíu muni lækka með lækkuðu heimsmarkaðsverði. Eftir breytingarnar verður lagt 45 króna gjald á hvern lítra af díselolíu en kílómetragjaldið verður lagt niður. Miðað við núverandi aðstæður þýðir þetta að díselolíulítrinn mun kosta nokkru meira en bensínlítrinn. Geir H. Haarde fjármálaráðherra sagði í Íslandi í bítið í morgun að hann hefði ekki búist við þessu. Algengt væri að bensínlítrinn kostaði 101 krónu en dísellítrinn um 48 krónur. Miðað við það hækkaði dísellítrinn í um 104 krónur að viðbættum hugsanlegum kostnaði olíufélaganna. Það væri staðan í dag. Geir sagði að ekki hefði verið reiknað með þessu en það sem hefði gerst í millitíðinni hefði verið það að sveiflur hefðu orðið á alþjóðlegum olíumörkuðum sem hefðu leitt til þess að verð á díselolíu hefði hækkað miklu meira en verð á bensíni. Það væri þó áreiðanlega tímabundin sveifla. 45 króna gjaldið leggst þó ekki á landbúnaðartæki, vélar í iðnaði og stóra atvinnubíla. Olían sem þessi tæki nota verður lituð til þess að greina á milli gjaldskyldrar olíu og hinnar. Díselbílar eyða minna eldsneyti og eru því umhverfisvænni en þeir eru hins vegar dýrari. Geir segir málið einmitt ganga út á það að hvetja fólk til að nota umhverfisvænni kost og því sé það vissulega óheppilegt að verðið sé svona hátt. Hann segir málið verða skoðað í haust þegar komin er á það reynsla og þá komi allt eins til greina að endurskoða olíugjaldið. Umhverfisráðherra, Sigríður Anna Þórðardóttir, sagðist ekki hafa vitað að díselolía yrði dýrari en bensín en leist engu að síður vel á breytingarnar.