Framtíðarhópi gert erfitt fyrir

Ingibjörg Sólrún Gísladóttir segir að ummæli Össurar Skarphéðinssonar, formanns Samfylkingarinnar, um að uppskera framtíðarhóps Samfylkingarinnar verði rýr, séu ótímabær og ósmekkleg. Hún segir ummæli hans gera hópnum erfitt fyrir í aðdraganda landsfundar. Össur Skarphéðinsson, formaður Samfylkingarinnar, gaf ekki mikið fyrir vinnu framtíðarhóps Samfylkingarinnar í Silfri Egils í gær en mótframbjóðandi hans til formennsku í flokknum, Ingibjörg Sólrún Gísladóttir, hefur leitt þá vinnu um tveggja ára skeið. Össur sagði í þættinum að að hann teldi að úr framtíðarnefndini kæmi miklu minna en það sem búið hefði verið að lofa. Ingibjörg segir þessi ummæli Össurar koma á óvart þar sem hann hafi aldrei viðrað gagnrýni á vinnu hópsins áður. Þar að auki finnist henni ummælin ótímabær og heldur ósmekkleg á þessum tímapunkti því hópurinn hafi ekki skilað af sér sinni vinnu. Ingibjörg segir að vinna hópsins verði kynnt á landsfundinum í maí en á tillögum framtíðarhópsins er ætlað að byggja nýja grundvallarstefnu og nýja stefnulýsingu Samfylkingarinnar. Hún segir ómögulegt að segja til um hvort Össur hafi með þessu gjaldfellt vinnu hópsins áður en umræðan fer fram á landsfundinum. Hann geri hópnum þó erfitt fyrir og setji vinnu hans í erfitt ljós í aðdraganda landsfundarins. Guðmundur Árni Stefánsson sagði sig úr starfi hópsins fyrir um tveimur vikum, að sögn vegna óánægju með vinnubrögð hópsins. Guðmundur er yfirlýstur stuðningsmaður Össurar í formannsslagnum og því vaknar sú spurning hvort úrsögn hans tengist þeirri baráttu. Ingibjörg segir að það kunni vel að vera. Það séu alltaf einhverjir sem taki sér það fyrir hendur að hanna atburðarás, eins og hún þekki úr pólitíkinni. Hún ætli þó ekkert að fullyrða um það.