Skerða framlög ganganna

Samkvæmt nýkynntri samgönguáætlun fara 85 milljarðar króna til samgöngumála næstu fjögur árin en af því fara 60 milljarðar í vegakerfið. Verkefni í grunneti, en svo kallast allir stofn-, tengi- og landsvegir í vegakerfinu, skiptast þannig að tæpar tíu milljarðar króna fara til verkefna á landsbyggðinni en 6,3 milljarðar til verkefna á höfuðborgarsvæðinu. Ráðist verður í mun færri verkefni í ár og því næsta en áætlað var í fyrri samgönguáætlunum en það fé mun skila sér aftur árin 2007 og 2008. Sturla Böðvarsson, samgönguráðherra, segir að ýmis smærri verkefni frestist vegna þessa um þennan sama tíma en fyrst og fremst skerðist framlög til Héðinsfjarðarganga. Í áætluninni er til þess tekið að fjárveitingar til jarðganga skuli miðast við að lokið verði við Fáskrúðsfjarðargöng og Héðinsfjarðargöng verði boðin út síðla á þessu ári. Ekki er tilgreint nánar hvenær framkvæmdir við þau muni hefjast. Breikkun og endurnýjun brúa er stór þáttur í vegagerð næstu fjögur árin. Bent er á í áætluninni að endurbyggingu þeirra miði hægt og viðhaldskostnaður vegna þeirra sé að jafnaði meiri en fjárlög gera ráð fyrir. Eðlileg viðhaldsþörf er talin um eitt prósent af heildarverðmæti allra brúa á ári en það eru um 300 milljónir króna árlega. Viðhaldsþörfin hefur þó aukist talsvert þar sem flestar brýr á landinu eru komnar til ára sinna enda margar byggðar um miðbik síðustu aldar. Auka á áherslu á umferðaröryggi með nýju áætluninni og hafa stjórnvöld sett sér skýr markmið fram til ársins 2016. Skal á því tímabili fækka dauðaslysum í umferðinni til jafns við það sem best gerist í heiminum. Reynt skuli einnig að fækka dauðaslysum og alvarlegum slysum að jafnaði um fimm prósent á ári fram til þess árs.