Gáfu mjólkina og töpuðu milljónum

Kaskó, Nettó og Bónus gáfu mjólkina í gær. Krónan seldi tvo lítra fyrir krónu. Fjarðarkaup seldi hana vel undir kostnaðarverði. Mjólkursamsalan framleiddi 40 þúsund lítrum meira af mjólk fyrir miðvikudagsverslun en hún gerir vanalega. Það er rúmlega helmingsaukning því vanalega framleiðir hún um 85 þúsund lítra, segir Leifur Örn Leifsson forstöðumaður sölu- og dreifingarsviðs Mjólkursamsölunnar. "Ég tel að neytendur hafi fyrst tekið við sér í gær. Svo virðist sem komið sé af stað almennt neyslubrjálæði. Lágvöruverslanirnar eru að tæma lagera Mjólkursamsölunnar í ákveðnum sérvörum" segir Leifur. Leifur segir Mjólkursamsöluna selja mjólkurlítrann á 78 krónur með virðisaukaskatti til verslana. Nokkurra prósenta afsláttur sé gefinn við magninnkaup. Hann segir að Mjólkursamsölunni berist nánast engar pantanir frá stórverslunum og hverfisverslunum á sama tíma og lágvöruverslanir panti margfalt. Landssamband kúabænda telur tap verslana um þrjár milljónir vegna mjólkurinnar, sé miðað við áttatíu til eitthundrað þúsund selda lítra og að helmingurinn sé seldur til lágvöruverslana, samkvæmt vef þeirra. Tapið er hins vegar að öllum líkindum meira þar sem sala mjólkur er meiri og hlutur lágvaraverslana stærri eins og að framan greinir. Fyrir lítrana 125 þúsund greiða verslanir um átta milljónir. Stefán Guðjónsson, rekstrarstjóri lágvöruverslananna Nettó og Kaskó, segir að ákveðið hafi verið að gefa mjólkina í verslununum til að mótmæla auraviðskiptum keppinautanna í Bónus. Þeir vilji gera betur og því hafi mjólkin verið gefin. Guðmundur Marteinsson, framkvæmdastjóri Bónus, segir að brugðist hafi verið við leik verslananna og mjólkin einnig gefin. Hann segir mörghundruð verðbreytingar gerðar í Bónusverslununum dag hvern. Stefán segir verðlækkanir hafa verið rétt undir tólf hundruð á dag síðustu þrjá daga í Nettó.