Kona sjómannsins fær góða dóma

Þrátt fyrir að nýjasta plata Emiliönu Torrini, Fishermans Woman, verði ekki gefin út fyrr en 31. janúar hafa margir gagnrýnendur gefið sitt álit á henni. Platan virðist falla vel í kramið hjá tónlistaráhugamönnum og hún fær jákvæða dóma hvarvetna á internetinu. Tónlistartímaritið Q gefur plötunni þrjár stjörnur af fimm mögulegum og segir gagnrýnandinn Dan Gennoe hana vera hina fínustu plötu frá hinni íslensku tónlistarkonunni. Með því á hann sennilega við að þetta sé ekki Björk heldur hin íslenska söngkonan. Hann minnist á að síðasta plata hennar, Love In The Time Of Science, hafi farið framhjá mörgum og einnig minnist hann að sjálfsögðu á lagið Slow sem hún samdi fyrir Kylie Minogue. Fishermans Woman þykir honum vera algjör andstæða við síðustu plötu vegna hversu órafmögnuð hún er. Lögin þykir honum bergmála af missi og eimmanaleika en þó segir hann gleðina í barnalegri röddu Emiliönu lyfta vonleysislegum tóni plötunnar heilmikið upp. Gagnrýnandi breska dagblaðsins Guardian gefur plötunni fjórar stjörnur af fimm og fer fögrum orðum um hana. Hann líkir plötunni við rómantískan kvöldverð og hrá gítar- og píanóhljóð minna hann á fjarlægt glamr í postulínsdiskum. Röddin þykir honum kristaltær og lögin sorglega falleg og í þeim undirtónn einmanaleika og þunglyndis. Í bestu lögunum að hans mati, Lifesavers og Next Time Around segir hann Emiliönu hafa tekist að ná þeim áhrifum sem fáum öðrum en Nick Drake og Leonard Cohen hefur tekist. Í lokin segir hann að í lögunum leynist miklar skapsveiflur en ýjar að því að fáir muni standast fegurð þessarar plötu.