Þjóðin eigi inni afsökunarbeiðni

Formaður Samfylkingarinnar segir að þjóðin eigi inni afsökunarbeiðni hjá utanríks- og forsætisráðherra vegna veru Íslands á lista þeirra þjóða sem studdu innrásina í Írak. Hann hvikar hvergi frá þeirri skoðun sinni að Ísland verði að taka af listanum. Í fréttum Stöðvar 2 í gær sagði Davíð Oddsson utanríkisráðherra að hvergi annars staðar nema hér væri rætt um að fjarlægja lönd af lista hinna staðföstu þjóða enda væri slíkt della. Hann benti á að þrjú af hverjum fjórum NATO-ríkjum hefðu lýst yfir stuðningi við innrásina í Írak. Össur Skarphéðinsson, formaður Samfylkingarinnar, segir utanríkisráðherra ómálefnalegan og að ummæli hans dæmi sig sjálf. Davíð sé eins og Halldór Ásgrímsson forsætisráðherra orðinn viðskila við eigin þjóð. 84 prósent séu á mót stuðning Íslands við innrásina og hvergi annars staðar hafi það gerst eins og hér, að slík ákvörðun hafi verið tekin án þess að nokkur sé spurður. Raunar haf lög verið brotin. Það brot á að felast í því að ákvörðun um stuðning Íslands hafi ekki verið tekin formlega fyrir í utanríkismálanefnd Alþingis. Utanríkisráðherra segir hins vegar að það hefði engu skipt. Stefna allra fulltrúa í nefndinni hafi legið fyrir og stuðningsyfirlýsingin undirrituð af þeim sem eigi að gefa slíkar yfirlýsingar, samkvæmt íslenskri stjórnskipan. Það greinir þá Össur enn á og segist Össur einnig undrast þær ólíku skýringar sem borist hafa frá fulltrúum Framsóknarflokksins um hvort eða hvernig málið var tekið til umfjöllunar hjá utanríkismálanefnd. Svo komi þriðja útgáfan frá utanríkisráðherra sem segi á fundi með harðkjarnastuðningsmönnum sínum í Valhöll að hugsanlega hafi ákvörðunin verið rædd í nefndinni og hugsanlega ekki. Össur spyr hvers konar vitleysa þetta sé. Svona hagi forystumenn þjóðar sér ekki. Össur segir að sér finnist að andspænis þessar eindregnu afstöðu þjóðarinnar verði forsætis- og utanríkisráðherra að skammast sín og biðja þjóðina afsökunar á að hafa brotið lög eins og þeir hafi gert þegar þeir lýstu yfir stuðningi Íslands við innrásina í Írak í algerri andstöðu við þjóðina.