Stelast í gegnum göngin

Verktakinn hefði getað skilað Fáskrúðsfjarðargöngum tilbúnum í síðasta mánuði, ef Vegagerðin hefði greitt flýtifé. Göngin verða því ekki opnuð fyrr en í október. Austfirðingar hafa litla biðlund og stelast í gegn, starfsmönnum til mikillar armæðu. Það var í september í haust sem starfsmenn Ístaks sprengu síðasta haftið og þar með voru göngin komin í fulla lengd, 5,700 kílómetra, og gat komið milli Fáskrúðsfjarðar og Reyðarfjarðar. Síðan þá hafa sjötíu manns unnið að frágangi. Verið er að leggja síðustu hönd á vatnsklæðningar og meðfram akbrautinni er verið að grafa drenlögn. Starfsmenn Rafmiðlunar eru að setja upp ljósagrind í loftið, á hana er lagður rafmagnskapall og ljóskastarar festir á til að lýsa upp göngin. Þá er malbikun komin vel á veg og stefnt að því að henni ljúki um miðjan júlí. Vegagerðin utan, að gangnamunnum, er einnig í fullum gangi en með henni mun opnast ný þjóðleið um fagran dal Fáskrúðsfjarðar. Steindór Óli Ólason, yfirverkstjóri hjá Ístaki, segja að unnt hefði verið að ljúka göngunum í maímánuði ef þeir hefðu verið beðnir um það. Það hefði hins vegar kostað peninga sem Vegagerðin var ekki tilbúin að greiða. Sigurður Oddsson, deildarstjóri Vegagerðarinnar á Norðaustursvæði, segir að menn hafi viljað nota peningana í annað, Vegagerðin hafi einfaldlega ekki haft efni á þessu, auk þess sem fjárheimild var ekki til fyrir flýtifé. Austfirðingar virðast hins vegar hafa litla biðlund og margir stelast í gegn. Steindór segir það mjög miður, enda beri Ístak ábyrgð á göngunum og öllu sem fari í gegnum þau. Hann segir þetta alvarlegt mál sem muni verða tekið fastar á. Stefnt er að því að göngin verði opnuð 3. október. Það eru því ekki nema rúmir þrír mánuðir í það að leiðin frá Fáskrúðsfirði til Reyðarfjarðar styttist um 31 kílómetra.