Sýna bak við bingó

"Við höfum verið þarna með vinnustofur síðan 2002 og höfum haldið sýningu árlega," segir Margrét M. Norðdahl, ein úr hópi ellefu myndlistar- og tónlistarmanna sem í kvöld opna sýningu í Skipholti 33b. "Á opnuninni verða góðar veitingar og jólastemning og svo spila hljómsveitir og tónlistarmenn," segir Margrét.

"Þetta verður kraftmikil og skemmtileg sýning, bæði í sameiginlegu rými og svo leyfum við fólki að kíkja líka inn á vinnustofurnar." Þau kalla sýningarrými sitt 33b og vísa þar bæði í húsnúmer, sjúkrahúsdeild og starfsmannaleigur. Húsnæðið er staðsett fyrir aftan hinn sívinsæla bingósal í Vinabæ, þar sem Tónabíó var í eina tíð. Þátttakendur í sýningunni, auk Margrétar, eru þau Pétur Thomsen, Karen Ósk Sigurðardóttir, Arndís Gísladóttir, Sandra María Sigurðardóttir, Sigurður Breiðfjörð Jónsson, Steindór Ingi Snorrason, Arnar Ingi Hreiðarsson, Elísabet Stefánsdóttir og Hrund Jóhannesdóttir. Opið verður í kvöld frá klukkan 20 til 23 og síðan um helgina frá 14 til 18.