Suzuki Swift hlýtur stálstýrið

Val Bandalags íslenskra bílablaðamanna (BÍBB) á Bíl ársins var kynnt í Perlunni í gær. Suzuki Swift var valinn Bíll ársins 2006 og afhenti Sigríður Anna Þórðardóttir umhverfisráðherra Stálstýrið sem er viðurkenning BÍBB vegna Bíls ársins.

Afhendingin fór fram á sýningu á vistvænum bílum sem BÍBB stóð fyrir í Perlunni um helgina. Auk þess að velja Bíl ársins 2006 var valinn bíll ársins í fjórum flokkum. Suzuki Swift varð hlutskarpastur í flokki smábíla og millistærðarbíla, Volkswagen Passat varð fyrir valinu í flokki fjölskyldu- og lúxusbíla, Lexus RX400h var valinn í flokki jeppa og jepplinga og BMW M5 í flokki sportbíla.

Við verðlaunaafhendinguna sagði Sigríður Anna Þórðardóttir meðal annars að sér væri sérstök ánægja að veita þessa viðurkenningu á sýningu á vistvænum bílum og minnti á að í vor hefði afsláttur á vörugjaldi á bifreiðum sem nota umhverfisvæna orku verið tvöfaldaður. Einnig hrósaði hún Bandalagi íslenskra bílablaðamanna fyrir framtakið.