Ísland er komið á kortið

Hagfræðingar KB Banka meta það svo að áhætta af erlendri skuldabréfaútgáfu sé minni en menn hafa ætlað. Ísland sé komið á kortið hjá erlendum fjárfestum og því sé minni hætta á falli en ætla mætti þegar að gjalddaga erlendu bréfanna kemur. Í nýrri skýrslu bankans er gert ráð fyrir að skuldabréfaútgáfa haldi áfram og því muni áhættan jafnast út. Vextir eru nú um tíu prósent hér á landi en tvö og hálft prósent á Evrusvæðinu. Þrátt fyrir að viðskipti með erlend skuldabréf í Íslenskum krónum séu tiltölulega ný byrjuð nema þau nú þegar 86 milljörðum króna, en þessir peningar eru mjög hreyfanlegir þannig að ef erlendu eigendunum dytti í hug að selja þessi bréf , myndi íslenska krónan hríð falla, líklega í stærra stökki en nokkru sinni fyrr. Á því er þó ekki mikil hætt ef marka má nýlega skýrslu sem hagfræðingar greiningardeildar KB Banka hafa gert. Þar er mið tekið af slíkri útgáfu skuldabréfa í myntum annarra vaxtahárra gjaldmiðla, landa eins og Tyrklands Póllands og Ungverjalands. Þar er hættan á spákaupmennsku skuldabréfaútgefendanna sögð lítil og óvissan um hvað gerist þegar að gjalddaga bréfanna kemur, eftir tvö til þrjú ár, sé hugsanlega meiri. Steingrímur Finnsson er hagfræðingur hjá KB Banka og einn skýrsluhöfunda. Hann segir mat greiningardeildar bankans vera að fjárfestarnir sem gefið hafi út skulodabréf í íslenskum krónum séu ekki líklegir til að fara að kaupa krónur til að verja útgáfurnar. Óvissan um hvað gerist þegar að gjalddaga bréfanna kemur, eftir tvö til þrjú ár, sé minni en ætla mætti í fyrstu enda sé fyrirsjáanlegt að útgáfan muni halda áfram og þar með jafna út áhættuna.