Aðeins þarf að segja upp þremur

Þjóðleikhúsið þarf aðeins að segja upp þremur leikurum en ekki tíu eins og til stóð þar sem sjö sögðu sjálfviljugir upp samningi sínum. Til stóð að segja upp tíu manns og ráða leikara framvegis frekar í ákveðin verkefni. Tinna Gunnlaugsdóttir þjóðleikhússtjóri hafði óskað eftir því að þeir leikarar sem vildu binda sig í verkefnum utan leikhússins losuðu samninga sína svo hægt væri að nýta þá fyrir aðra. Þeir sem þetta gerðu voru Þórhallur Sigurðsson, Stefán Jónsson, Edda Heiðrún Backman, Pálmi Gestsson, Sigurður Sigurjónsson, Randver Þorláksson og Ívar Örn Sverrisson. Þeim þremur leikurum sem hafa stystan starfsaldur við leikhúsið var sagt upp en þeir voru ráðnir árið 2002 eða síðar. Ekki fæst uppgefið hverjir það eru.