Tónleikar til eflingar náttúruvernd

Miðasala á tónleika til eflingar náttúruvernd á Íslandi hefst á fimmtudag. Tónleikarnir verða haldnir í Laugardalshöll þann 7. janúar. Þar koma fram Björk, Damon Albarn, Sigur Rós, Hjálmar, Ham, Trabant, Magga Stína, Múm, Rass, KK, Zeena Parkins, Ghostigital og Egó, og einnig verða þar óvæntar uppákomur.

Með tónleikunum vilja skipuleggjendur og listamenn beina athyglinni að náttúru Íslands og því að hún sé ekki sjálfsögð uppspretta raforkuvera eða álvera.

Allir listamenn, skipuleggjendur og þorri starfsmanna gefa vinnu sína í þágu málstaðarins. Verði hagnaður af tónleikunum mun hann renna í sérstakan sjóð Náttúrufélags Íslands sem notaður verður til að efla  náttúruvernd á Íslandi.

Miðsalan á tónleikana hefst klukkan 10.00 á midi.is, í verslunum 12 Tóna, Smekkleysu, BT og Skífunnar og í Kaffi Hljómalind. Miðaverð er 3.000 krónur í stúku en 2.500 í stæði auk miðagjalds.